ANTEMURO
(Relaciones... 2001:248)
[...] del dicho señor condestable mandó derrocar e desbuçar todo el andamio del adarve que viene un poco abaxo del postigo en par de la Llana, de parte de la çibdad; por manera que persona ninguna de los dichos alcáçeres pudiese andar po él, nin desçender a tomar torre alguna contra la dicha çibdad.
Y mando tapiar las dos torres primeras que estaban mas çercanas al dicho adarve que su merçed mandó derrocar. E mandó çerrar todas las almenas, e techar las torres con tapiales e muy gruesas vigas, por las piedras e tiros de pólvora que de arriba tiravan.
Y ençima de los dichos tapiales que en las dichas torres estavan, mandó poner unos mandeletes, porque más segura estoviese la gente debaxo dellos. Y en la segunda destas torres que así estavan tapiadas, mandó poner una media lombarda, con la cual tiravan a una ventana de una torre de las principales del alcaçar Nuevo. Las quales dichas torres estavan guarneçidas de muchos vallesteros y espingarderos, de noche y de día.
